Search


Jun 21, 2016

Kristien Hla Bu Thlirna-2


Part 1- a khan kristien hlahai hi Baibul sunzomna a ni thu dam, ei thuring le inkhuongruol hla nei a poimawzie le chu dinga fimkhur a trulzie dam, eini rawiin ei kawpi tak Lusei tronga hla lo inlettuhaiin ringtu hmasahai chawmna dinga an fak thei tawk thu an hla inleta an lo phum dan dam le hla inlet dika ei ngai, sienkhom indik si lo threnkhat entirna dingin ei hung tar lang a. Tuta rum chu gawp ang deuin, a hung inlang hmasa sa hang vaihma inla.

Hla trongkam
Saptrong le eini trong indanglamna bek bek pakhat chu einin hla trongkam bik thumal ei nei treuh laia annin an nei ve tlat naw hih a nih. Hla an phuok pha a tlar tawpa lamrik inang (rhyming) le insam inhoi le mawi dinga thumal rem khawm (meter) thiem tieng an uor a. Eini ruok chun a thu luong le trongkam infawn mawi (internal rhyme) ei uor. A pahnia thaw thei lem chun duthusam a nih. ‘Kan tlangram mawi’ ti hla hi chuong anga tlar tin lam riet le rhyming nei vonga ka phuok a na, a sama insam ringot khomin a hnîngzu intem phak a nih:

A thing zăr mawi, va tin kaina,
A changram hnuoi, sa rûn lumna;
Puolrâng thla khawng, muol tin hrûtin,
Văn zâi an rem, mawi chuong rĕngin.

Hmar trong le Lusei trong hi Zo hnathlakhai trong laia inhnai tak le hla trongkama khom a hausa tak an ni el thei. Chuong chu ni siin, ringtharhai sak dinga mingo misawnarihaiin Saptronga hla an inlet khan ieng leia ei hla trongkam hmang loa bazaar tronga an lo inlet vong am ning a ta? Annin ei trong an thiem tawk naw lei le hla trongkam bik ei nei ti an hriet naw lei am, an naw leh ringtu ei ni hmaa ei thu le hla le thluk hrim hrim kha ringnawtu thuomhnawa ngai a, mi’n hnawmhnawltir vong a, an kalchar pawhleu le an sakhuo hung phur lut chu a ruola mi’n biektir an tum lei lem?

Hi hi zawna don harsa tawp el a nih. A rizal ruok chu a chieng. An hla thluk ngar fuk el, bazaar tronga an inlet le an sakhaw thar hung phur lut, an kalchar zieranga an inthuomtir tah chu inkhor takin an mi’n biektir a, ei lungril an bawi a, salah an intangtir a, Pathien ang thawthanga mingo hrim hrim ngaina eini lai an tu a. A kakhawk iem? Zo hnathlak kristien intihai hi khawvela hnam dawikawlok tawp, mani pi le pu trongkam le zaia Pathien inpak ngam lo hnam um sunah an mi siem el a nih. Ei thu le hla hluihai phum hmang chu rongbawlna ropui taka ei ngai a nih.  Chu chânga chun ei la’n tâng zing. Pathien thu ngiela ei ngai tam tak hi ei bi chieng pha chuh Pathien thu lo deu el a lo tam nuom khop el. Pawl indaidanna banga ei inhuon khum fir ferna khawvela hin a tam zuol a hoi.

Mizorama a tira misawnarihai rongbawlna kha hma a sawn hrat naw hle a. Kum nga hnungah ringthar hmasa tak Khuma le Khara haiin baptisma an chang trawk a. Kum 12 hnungah ringthar 471 an tling phak chauh. Amiruokchu, Puma Zai leia nasa taka pipu zai hrang hrang, Tlanglam Zai an ti hung puok darin ringtharhai a hung vuok let hnung khan ringtu tam tak an hnung kir a. Hieng lai hin 1919 Harna vuok vetin hla thar, lengkhawm zai, mani hnam zai zula phuok, tuoltro Kristien hla a hung phusuok a, chu ruol chun khuong khom biek inah an lak lut nawk a. Ei kal le inrem tuoltro hlain hmun a hung changa inthokin khăr a hung nor hong a, Mizoram pumpui deuthaw chu kristienah sawt naw te sungin an hung lut tah pup el a nih. Churachandpur (Manipur), Jampui Hills (Tripura) le Satikang (Chittagong Hill Tracts) le Cachar Biela Saptlangvala rawihai rongbawlna khom chu hun chu a fe hrat lai tak a na, a san bulpui tak khom tuoltro rongbawltuhai kut le tuoltro thu le hla hmanga hma an nor lei a nih. Thlarauin hmangruoa a hmang tak chu lengkhawm hla thluka sak thei Saptronga mi hla inlet le tuoltro hla an phuokhai a nih. Hla hmangin Thlarauin mi a pawl a, chu ding chun ei hla hriethai chauh a hmang hlak. Ei thu chang baihat nekin ei hla chang baihat hi lungrilah a riek sawt lem a, ei theinghil mei mei ta nawh. Chuleiin, kristien nuna ding chun hla hi a hnukpui a nih ti naw ruol a ni naw hrim a nih.

Baibul hmun thuma threa hmun khat hi hla ruonga ziek a ni a, Joba-Malaki sunga hin chuonghai chu a um.  Saptrong Baibul tam taka hin hla ruonga an ziek khom thu ruonga an inlet a tam a, chuong ang chun eini khomin ei lo kawpi ve pei a, ei chokchawrawi nasa hle. Delhi Version-a ruok chu hla ruonga an phuokhai chu a ni ang charin kan sie ve a, sienkhom a trul zuolnaa chauh hla trongkam kulmut kan hmang a, thutluong leh a mawi tawkin kan chekpol a nih. Entirnan, Sam 8:3-5 chu hieng ang hin tlar tin lam sariin kan sie:

I kutsuok thangvan sanga,
Sorthla si-ar i’n nghathai,
Thlira ka dawnkhawl changin,
Hringmi hi ieng am a na,
I hriet fuk lop lop el ni?
Hriem nauhai khom iem an na,
I ngaisak em em el ni?
Angel hnuoi thretah sie-in,
Ropuina le chawimawina,
Tonlairang i’n tontir a…

Tiemtu threnkhat chun “A Hmar taluo, a Baibul trongkam nawh, ei tiemin pang a suktrim” an tih. Solomon hla 2:5, BSI inleta, “Grep ra trawl bawrhai le chun min umtir la, Apple chun mi sukhlim rawh. Hmangainain ka na sih a” ti-a an sie hi DV-a chuh “Grep beiin mi sukhrat la, Epul theiin mi sukhar rawh, I zŭna inuoi ka ni hih!” tiin kan sie a. Ei pi le pu hun lai khan tlangvalin, “Hmangainain ka nâ a nih” ti vai sien, “Hmangainaa nâ chu mi dukdaklo le thabo a ni chuh, zei hrep ro” ti ngei ngei an tih. Lu na, phing na, kal na, khawsik-malariaa na, kansara na le natna dang dang a tam, ‘hmangainaa nâ’ ti trongkam ruok chu ei nei ngai nawh. Ngaizawng ngaia tlep le inuoi hai chu ‘zŭn ngai’ ei ti hlak. Chuleiin, ei hla pakhat, ka tunu Roselyn (Hmelthra) sak hlaka “Hmangainain ka na ti lo hril ro” ti dam hi hril dêr lo ding a nih, a ngaizawngin mi depde le thabo lo sawn rawi a tih. Baibul trongkama ei ngai, ‘hmangainaa nâ’ chu zei hrep tlak a nih.

Ei hlaa ei hmang rawn, “mitthli hrûk faipek” ti hih BSI sut Thupuong 21:4 a, “An mita inthokin mitthli po po hrufai a ta” tia inthoka an lak amani ding, ei hlaa hin a chuong rawn khop el a. Kappu khomin, “I lungngai mitthli po po khom, la hrufai pek ka che..” tiin Pathien a’n trongtir a. Ei hang ngaituo chik deuh chun, an mitthli bal a hruk faipek ding thu hrilna ni loin, an mitthli a hrûk hul ding thu a hrilna a nih. Kong danga hril chun, mitthli tlak tah nawna rama um ding an ni leiin an mitthli a hul tah dingzie thu a hrilna a nih. Chuleiin, ei Baibul amanih le ei hla bua ‘mitthli hrûk fai’ ti po po hi ‘mitthli hrûk hul’ tia thlak vong ding a nih.

Chun, ei thu le hlaa luong lut rawn dang chu ‘ta dinga thi/tuor/hemde’ ti dingah ‘aia’ amanih ‘sika’ thi/tuor/hemde’ ti hi a nih. ‘Aia thi’ ti hih Substitute Theology cho suoktu a na, inselna tam tak a hring suok bok.  Ei Baibul inlet hmasatuhai fimkhur zo naw leiiin hi trongkam pahni hi kawk inangin an hmang inkarthlak rawn a, thil thuhmun a ni nawzie an hriet naw ni mei a tih. 2 Kor 5:14 a chun Paula introngsuoltirin, “Mi po po thi aiin mi pakhat a thi a, chuleiin, mi po po chu an thi a nih”dam ei intitir a. Ka aia thi le ka aia tuor a ni chun ka thi le ka tuor a ngai ta nawh. Zuolkoa ka aia fe an um chun ka fe ve a ngai ta naw a, zuolkoa ka ta dinga fe an um ruok chun siet kan tuok tina a nih. Ka ta dinga hla mi khumpek dingin hla sak thiem ka ruoi thei a, sienkhom a hla khum chu ka aia khum a ni naw a, ka ta dinga khum a ni lem. Krista aia palai ka ni chun Krista ai ka aw ta leiin ama thrang a ngai ta nawh. Krista ta dinga palai ka ni ruok chun a tirko ka nih tina a nih. Rom 8:32-a chun “Ama Naupa ngei khom hla loa ei renga aia petu chun thil dang po po khom a thlawnin a mi pek sa naw ding am a ni?” dam ei intitir bok a. Taksaa eini aia thi ni tak tak sien, thi loin, a hringin van ramah ei inlawi vong ngai a ta, thlarau tienga eini aia thi ni sien, chatuonin hremhmuna eini fe aia a fe ngai bok a tih. Chuong chu a ni chun ringna ei hril vet hi a trangkaina iem a um? Substitute Theology hi inchuktirna trium a nih. Krista chu eini aia thi ni loin ei ta dinga thi a ni lem. Chuleiin, ei thu le hla bua ‘aia/sika thi’ ti-a inziek po po hi ‘ta dinga thi’ ti-a thlak vong ding a nih.

Chuong ang bokin, “Thu chu tisain a hung inchang” thu hrilna po po hi “Thu chu taksain a hung inchang” tia thlak vong ding a nih. Tisa thil chu Pathien thil le inkal tlat a ni leiin, THU chu tisaa inchang a ni chun Pathien theida zawng a ni leiin, tu khom sandam ni thei naw ni hai. Thu chu mihriem taksa putin a hung inchang a ni lem. Ei Baibul inlet suola ei trongkamhai hi ei hlaah a luong lut a, Pathien thutak hril le ama chawimawia ei inngai lai hin a theida zawng ei hril ngat ngat a nih. Chun, “thilsuol thaw” (sinning, committing sin) ti “thil suksuol” (committing mistake/blunder) tia ei Baibula indik lo taka an mi lo inletpek po po hi ei Baibul le hla bu le ei sakhuo lekhabu po poa inthoka inthiel fai vong a ngai. Entirnan, “Ka thil suksuolnahai lei chun, Kros chungah a’n rum a” ti dam hi “Ka thilsuol thawnahai leiin, Kros chungah an rum a” ti ding a nih. Adam le Evi khan thil an suksuol a ni naw a, Pathien thupek hre zing sia an bawsiet leiin thilsuol an thaw a nih. Hi indanglamna khom hi hre loa kum za chuong hiel kohran thruoituhaiin an mi tlingtlakpui hi, lunginsietna hun ni naw sien chuh, ei chung rik ngot dingin ka ring.

Hieng “Kristan suol thawina a siem tah” (SSS 119) ti dam hi hang ngaituo chieng la, umzie nei map lo a nih. Inthawi hi ramhuoi suklungawina dinga ran inhlana ramhuoi an biekna a nih. Ei pi le puhai khom, Israelhai khom Pathien kuomah an inthawi ngai naw a, ran amanih thilpek dang inhlanin an biek a, a hmaah malsawmna hniin dawvan an kai a, chu chu ‘sakhawhmang’ an tih. Kristan suol inthawina a siema ei hril chuh Setan kuoma a siem a ni ding? Pathien kuoma inthawi ni sien, Pathiena mi pathum laia pakhat, Naupa ngirhmun chel a ni leiin, ama le ama kuomah a’n thawi ning a ta? Ieng zawng khomin hril tum inla umzie a nei naw a, ei thuring leh khom an inmil nawh. Kristan suol inthawina a siem nawh. A Saptronga chun, “Christ has for sin atonement made” ti a ni a, chu chu tulai Saptronga hril chun “Christ has made atonement for sin” ti ning a ta, ‘suol thawina’ ni loin ‘suol intlanna’ a siem lem a nih. Chuong chu ni siin, ei la’n ‘thawitir’ zing ding am a ni? Tu kuom am ie? Mani le mani kuoma inthawi chu ieng theulawzi am a ni reng reng?

Mi sang tam tak hla sak ding?
Kristien Hla bu-a mi ei sak rawn pawl chu, “Aw mi sang tam tak hla sak ding” (OH for  a thousand tongues to sing” (SSS 243) ti, “Aw mi sang tam tak hla sak ding” tia ei inlet hi a nih. Mi hla sak tah amanih sak lai zawm ve dinga infielna khom ni lo, mi hla sak ding ei khukpui hlut el hlak hi chuh, a bass sak pawl ta dinga phŭr a um lei am a ni ding, ngaituona pangngai hmanga inngai sihai hang thaw chi chuh a ni naw deu naw maw? A phuoktu phuok dan chu ni sien, kaisana inthok pawlhai khomin, a zai hang zawm ve chu thil awm a ni tho ie. Sienkhom, a phuok dan le ei inlet dan hi sim le hmar angin an indang bok si. Kha hmaa Statehood hnia lam an hraw lai, an khekpui chu “We demand” tiin thruoituin insam a ta, mipuiin “Statehood” an ti ding a nih. A hnungkhawna thrang nupui papui, hmeithai chem mawla mawl, an lam hraw san khom hre lo, an thu insampui umzie khom hre lohaiin “We demand” an ti zo pha leh, “Tehu, Tehu” tia an insam ang leh khan danglamna ei nei nawh.

Hi hla hi hla 6000 chuong zet phuoktu Charles Wesley (1707-1799) in chuop natna (pleurisy) an voi lai, kum1738 May thlaa a phuok a nih. Ama hi Anglican pastor le hla phuok thiem Samuel Wesley le a nuhmei Susanna hai nauhai laia a 18-na a na, a u John Wesley chu Methodist Kohran indintu a nih. A phuok lai hin anni unau ruol laia a nina changchawia a phuok amani ding, hi hla hi chang 18 zeta sei a nih. Kum 1780-a Methodist kohran hla bu sutah a phuoktu piengtharna champha lawmna malamin an inthrangtir a, chu chu hla bua a chuong hmasakna tak a nih. Sacred Songs & Solos (SSS) bu, R. Sankey rawia an siema chun chang 7, 8, 9 & 10 an lak a, chang 1, 2, 3 & 4-in an sie a. Lusei tronga inlettu Sainghinga chun khang laia an thaw dan hmangin, inlet-phuok thawin, SSS-a mi po tluong takin a hung thur suok a.  Lusei tronga Kristian Hla Bu zula kohran tin hmang dinga kohran po po inthuruola kum 1952-a Hmar tronga Kristien Hla Bu a hung suok khan a tam lem chu Lusei tronga mi an inlet, a thren an lung tluk zawnga hla zierang put lêm loa an kei her a nih. Chuonghai lai chun ei hla bi lai hi a thrang ve. An taimakna, tlawmngaina le inrimpuina leia inpak an um lai zingin, an kuthnung enin, hla tienga chemkal mi an tlawm amanih aw ti dingin a um.

Kum 2003-a sut Tonic Solfa Edition-a khan a awrizinal-a inthoka chang 11 & 12 hung la belsain, chang 4 & 5-naah hmangin, a hmaa chang 4-na kha a tawpah an sie a, kha hmaa hla chang li kha chang ruk a hung ni tah a nih. Hla chang pahni an belsahai hi thu ben muka sip a ni leiin inlet a hautak a, sienkhom a tlangpuiin an thaw thraah ngai inla. A fuk nawna pahnih a um a. Pakhatna chu chang 4-naa “Mithihan a rawl chu hrein, Hringna thar an dong tah” ti hi a nih. ‘Mithihan’ a ti hih dannaranin mithi, thlăna zâl tah ni dingin ei sie vong ring a um, a san chu a tlar nawka hin ‘Hringna thar an dong tah’ ti a chuong leiin. ‘Tah’ ti hih grammar dana chu past perfect tense a nizie hriltu adverb a nih. Sienkhom, a phuoktu phuok dan chun, “He speaks,-and listening to his voice, New life the dead receive” ti a ni a, present continuous/perfect tense a ni bakah adverb a thrang ve nawh. “A rawl ngaitu mithihaiin, Hringna thar an chang/dong/nei a” ti ding a ni lem. ‘Mithi’ a tihai hi Eden bawsietna leia thlaraua thi mihriemhai a hrilna a nih. Mithi hnung, thlana zalhaiin Isu rawl hrea an hring nawk thei anga ngai le hril hi thuring indik lo a nih. Paula le Korinth kohrana mihai inkara mithi hnunghai sandamna lampui satpek thua ngaidan inphir a suokna san khom kha hieng ang inzirtirna a um lei a nih (1 Kor 15:29). Mithihai lai thu hril thei a ni chun thlanmuola sandamna beiruol thaw chur chur ngai a tih.

Chun, chang nganaa “Your loosen’d tongues employ” ti “Lei intlanhai hril ro” tia an inlet khom hi Hmar tronga thil la um ngai lo a ni leiin,  ‘lei intlan’ ti chuh a buoithlak khopin ka hriet. Kha hmaa a phuoktu phuoka chang sawmna, ei ni hla bu sut hmasaka chang lina, “Suol thuneina a sukbo tah, intâng a mi’n suo tah” ti le insersuon, a hmasa lema um kha a nuhnung lema mi chang hni an rol lut leia thu inlekhalin a kei buoi a nih ti an man naw khom a ni el thei. Tawlailir hnuktu ding sakor hmaa tawlailir sie an hril ang deuh hi a nina chin a um. Suol thuneinaa inthoka insuo zalentu chu intîm lo le insûm loa rawl tawp insuoa inpak dinga a hrilna a nih. Formal equivalence hmanga a ngiel a ngana (word for word translation) inlet thei a ni naw chun, a thu pai le umzie phur suok dinga informal/functional equivalence hmanga inlet el ding a nih. Tu laia an phuok lem chu ni sien, ‘loosen’d tongue’ ti dam hi ‘loose tongue’ ti leh ngai pol a olsam leiin, an hmang nuom ka ring ta nawh. ‘Loose tongue’ chu trongtlahol, nuom nuoma inpawt le inhrâm mei mei tina a nih. ‘Loosen tongue’ ruok chu lei intar sukthawl; dangawk dang nâla siem; lei li suknăl; trong thra ngam lo, huoisen tak le zalen taka trong theia siem a nih. Mi ngawichawi, trong zen zen lo, sienkhom zu no khat no hnih a dawn hnunga hung trong nuom tah em em dam hi zu thilthawtheinain a zakkhăr (inhibition) a chie hong lei a nih. Ei inlet fie thei lo hla chang belsa nekin bel lo a him lem. ‘Lei intlanhai’ ti chuh a buoithlak deu a nih. Kei chu ka bo map.

A bebawmah ei tuihlim cheng sawt ta a, ei hril tum takah lut tang ei tih. Hla phuoktu Charles Wesley-in “Oh for a thousand tongues to sing” a ti hin mi sang tam tak hla sak ding thu a hril tum naw a, a hril bok nawh. Ama rawl khât chauh ni loin, rawl sang tam tak neia Pathien inpak a nuom thu a hril lem a nih. Chuleiin, “Rawl sang tam neiin sak thei lang, ka Tlantu inpak hla” ti lem ding a nih.

Trong hmang dik
Ei hlaa trongkam indik lo ei zep po po hi hang bi chieng inla, ei Baibul hmang tak BSI sut, Lusei tronga inthoka an inlet sawnga an inlet suol le thumal an hmang suolin a mi thruoi lei le Lusei tronga an hla lo inlet, a ngiel a ngana ei kawpi sawng lei a ni nuom khop el. Entirnan, “I’d rather have Jesus” ti hla, 1922-a Rhea F.Miller hla phuok, 1932-a George Beaverly Shea-in a thluk a siem le a sak lar, Billy Graham Crusade-a an hlapui laia pakhat hi Lusei tronga inlettu Dr. R.K.Nghakliana chun, “Isua neih ka duh zawk, ro hlu ber aiin” tiin a’n let a, chu chu zuiin ei hla buah “Isu nei ka nuom lem, ro hlu tak nekin” tiin an sie a.

Hang en thuok chun a tluong zut el. Ei bi chieng ruok chun a fûk chie nawna a um. A fuk nawna chu ‘duh’ thumal a hmang, einiin ‘nuom’ tia ei inlet hi a nih. Mihriemin ni ‘nuom’ le thaw ‘nuom’ ei hau. Sienkhom, thilthawin a zui si naw chun ‘nuom’ ringotin umzie a nei nawh. Duthusam leh a danglamna rak a um nawh. Hi hlaa ruok hin chu sum le pai, in le lo, inlalna, chawimawina le hmingthangna nêka Isu nei a ‘thlang’ lemzie, chu dinga thutlukna a siem tah thu a hrilna a ni leiin, “Isu nei ka thlang lem, ro hlu tak nekin” ti ding a ni lem. Van rama fe nuom si, a tehlema Isu ringa inhril, zui pei si lo, piengthar nuom le piengthara insâl, ditthlangna fel tak neia zui pei si lo, lemchang ei tam em em hi ei bi chieng chun a ‘nuom’ dikri chen fe a, a’thlang’ dikri chuong kai pei lo ne nuom lo ei tam lei a ni a, thil mak a lo ni nawh. HCFD Chawibiek inkhawma thu ka hril nuhnung takin hi hla hi ka thlang a, “Isu nei ka thlang lem” tia sak ka thlang lem thu ka hril lawk a, sienkhom “Isu nei ka nuom lem” tiin an mi sakpui tho tho. Nuom thu mei mei hril hril loa thlang ding a nih. Rev. Zosanglien khomin hieng hin a lo ti khah:

Dit lem thlang a hun lai hin,
Zong ve la, Thlarau Thienghlim,
Sinsiena chu chang lem rawh.

Immanuel a thizamah
Hla pakhat dang, ei sak rawn pawla ka ring chu kum 1772-a William Cowper phuok, ‘Immanuel a thizamah’ ti hi a nih. A châng dang an inlet dan chu ngaidamna bawmah thlak inla. A chang lina,

Thil dang nêkin i hla mawi tak
Hi khawvel thlan hmunah;
Hlim le lawmin inpâk ka che,
I mi sandam leiin

ti ruok hi chu a ngaina tak hriet harsa ka tih. Upa Ngama thukhawchang hmangin, “A mi hril zo thei hi tu’m um an ta?” tia indon ei nuom ve el a nih. Hang bi chieng inla, hi khawvel thlan hmuna thil dang neka hlim le lawma inpak dinga a hril chu “i hla mawi tak” ti hi a nih. Hla mawi tak chu hlima inpâk neka a saka sak ding ni lem awm tak si maw! Chuleiin, rawl tawp suoa insîm hmer hmera ràu deu taka hi hla sak hlakhai hin ieng thlarau am a na ei chang? Tam takin hla hi a thluk leia ei sak mei mei a na, a umzie ngaituoa sak chu vâng tè ei nih. Baibul inlet suol hmanga hla an phuok, “Ka sunghai tu am an na?” ti dam ei sak chur chur hi thil awm hrim a lo nih.

Ei hla thlir lai phuoktu chanchin hi ngainuomum deu el a nih. Ama hi pa dangawk, trong vak vak harsa ti mi a nih. Ukil ni tumin Law a’n chuk a, a zo a, sienkhom lungril buoina a nei leiin chuong tieng chun a’n hmang zui thei ta nawh. Voi tam inthat a tum a, sienkhom mak taka sansuokin a um pei a. Kum khat le a chenve zet invet sie khawmnaah a um hnungin damten a hung thra suok a, kum 33 mi a tling kum 1764 khan a piengthar a. A hnungin ‘Amazing Grace’ phuoktu John Newton umna Olney khuoah a khawsa a, thu le hla tienga rongbawlah Newton leh inthlopin hla 349 lai an phuokhai chu a bu-in an siem a. Olney-a a um sung hin Cowper-in hla 67 zet a phuok nia hriet a nih.

Hi hla ei bi lai hi a phuoktu chanchin hriet hnung chun tlar tin hi a testimawni a nizie inhmai ruol a ni nawh. Ei hril tah ang khan, pa dangawk, trong vak vak harsa ti, hawrop threnkhat lam fie thiem lo a ni leiin, a piengziein zir nghal lo chu, a nuom anga nasain Pathien sandamna ropuizie a khekpui thei nawh ti a hriet a. A thi pha ruok chu dang inawk ta loin, vantirkohai leh ropui takin Krista sandamna thilthawtheizie inpakin hla mawi a la rem tah dingzie thu ei chang bi-a hin a hril a nih. Chuleiin, ei hla bua ei inchuon leh hin an inpersan daih a nih. Saptronga a phuok dan chun hieng ang hin a nih:

Then in a nobler, sweeter song
I’ll sing Thy power to save,
When this poor, lisping, stammering tongue
Lies silent in the grave.

Hi a hla phuok le ei hla bua an inlet hi chu sim le hmar ang deuthawin an inpersan a nih. A phuok dan angin inlet inla chu, hieng ang deuh hi ning a tih:

Kei dangawk le trong fie lo hin,
Dairiel ka chang pha chun,
I sandam theina inpakin,
Zaiin chawi ka ti che.

Hriet mang naw karin ka lo titi sawt ta rek a, hril ding tam tak intieng hnûr sien khom, hun remchang danga hril dinga khekin la suktawp hri phot inla. Hla hi Baibul sunzomna a ni leiin, ei hlahai hi ei thuring le inmila fimkhur taka ei duong a poimaw.

(June 21, 2016, Delhi)

###

No comments :